Í dag lét ég af starfi formanns Snorrasjóðs eftir að hafa gegnt því sl. 9 ár. Snorrasjóður ber ábyrgð á undirbúningi, framkvæmd og þróun Snorraverkefnanna. Snorraverkefnið veitir ungu fólki af íslenskum ættum í Norður-Ameríku tækifæri til að dvelja á Íslandi í 6 vikur, þar af 3 vikur hjá ættingjum sínum víðs vegar um landið. Yfir 300 vestur-íslensk ungmenni hafa tekið þátt í verkefninu undanfarin 20 ár. Á sama tíma hefur um 100 íslenskum ungmennum gefist kostur á að ferðast í 4 vikur um svæði íslensku landnemanna í Vesturheimi og kynnast afkomendum þeirra. Alls eru Snorraverkefnin nú 5 talsins.Starf mitt að Snorraverkefnunum hefur veitt mér ómælda ánægju og tækifæri til að kynnast fjölmörgu fólki af íslenskum ættum sem býr á ólíkum stöðum víðs vegar um Norður-Ameríku.Um leið og ég þakka samstarfsfólki mínu undanfarin 9 ár fyrir gefandi samvinnu og fórnfýsi, óska ég eftirmanni mínum Huldu Karen Daníelsdóttur og nýrri stjórn Snorrasjóðs alls hins besta.

Halldór Árnason